وقالت عبير أحمد، في تصريحات صحفية، إن أغلب الأسر المصرية أعلنت حالة الإستعداد القصوي لامتحانات منتصف العام الدراسي، بمختلف المراحل التعليمية والعمل علي تهيئة المناخ المناسب داخل المنزل لدعم الأبناء، وتخصيص مكان مريح لمساعدتهم علي التحصيل وضمان اجتيازهم الاختبارات بثقة ونجاح.  

واكدت مؤسس إتحاد أمهات مصر للنهوض بالتعليم، أن الطريقة الأمثل للاستعداد لامتحانات منتصف العام، تعتمد علي مستوي استيعاب الطالب، فإذا كان الطالب متمكنًا من الدروس، فإن المراجعة وحل الامتحانات تعد خطوة كافية، أما إذا كانت هناك فجوات دراسية ونقاط ضعف، فمن الأفضل إعادة دراسة الدروس من البداية.

وتفاعل عشرات الأمهات من أولياء الأمور علي صفحة إتحاد أمهات مصر للنهوض بالتعليم، وإئتلاف أولياء الأمور، في الفيسبوك، حيث قالت ولي أمر: "طبعا احنا لسه مخلصناش المنهج فالأفضل نراجع القديم كل يوم جزء مع الجديد عشان متنساش القديم وقبل الامتحان بأسبوع نمسك الجدول عكسي اخر ماده هنختم بها الامتحان، نبدا بيها من أولها لاخرها يوم وحدها لحد ما نوصل للماده اللي هنبدأ بيها ورضا علي كده". 

وأضافت ولي أمر: " أنا شخصياً مع بنتى بنذاكر كل درس من أوله لحد مانخلص المنهج، بس بنبدأ بالدروس الاخيرة عشان طبعا ملحقناش نذاكرها، وبعد كده نبدأ نحل مراجعات وامتحانات، متعودة على كدة مع بنتى الكبيرة اللى فى الجامعة ودلوقتى مع بنتى الصغيرة اولى اعدادى".

واستكملت ولي أمر أخري: "نراجع الدروس من الملخصات اللى مع الكتب الخارجيه زى مثلا المفكره فى كتاب الامتحان ونحل امتحانات والسؤال اللى منعرفوش نرجع للكتاب نعرف الاجابه ونذاكرها وبعدين نجاوبه"، وعلقت ولي أمر أخري: "نحل امتحانات واى قصور فى اى جزئية أثناء الحل ممكن نراجعها سريعا ونكمل باقي حل الامتحانات".

وتابعت ولي أمر اخري: "أكيد لازم تتم المراجعة من الأول و بعدين نحل.. عشان كده الطريقة الأفضل في المذاكرة في البداية اللي تسهل و تسرع المراجعة وقت الامتحان هي: اما عن طريق استخدام قلم الهايلالتير لتحديد الأجزاء المهمة و اللي فيها المعلومة المطلوبة من الدرس، أو كتابة ملاحظات عن الأجزاء المهمة في حالة الطالب اللي بيفضل المذاكرة بالكتابة، ده هيسرع عملية المراجعة لان الطالب بالفعل عمل "فلترة" للإجزاء المهمة و مش هيشغل نفسه بالإضافات و هيبقى عنده وقت اكتر للحل، كمان فيه طلاب بيفضلوا يحلوا على الجزئيات في البداية و بعد كده يحلوا الشامل، و ده اسلوب كويس في الأجزاء اللي بتحتاج حل اكتر من غيرها او فيها حالات خاصة و تريكات اكتر من غيرها و الامتحان الشامل ممكن ميكنش كفاية للتدريب عليها. و بالتوفيق للجميع إن شاء الله. احنا لسه ثانوية عامة بس حبيت أشارك تجربتي مع ابني".

يمكنك مشاركة الخبر علي صفحات التواصل